Çin ŞƏT-in Azərbaycanla əlaqələrinin genişlənməsini dəstəkləyir – Si Cinpin

Çinin Tyançin şəhərində Azərbaycan Respublikasının Prezidenti İlham Əliyev ilə Çin Xalq Respublikasının (ÇXƏ) sədri Si Cinpin arasında görüş keçirilib.

Azərbaycan dövlət başçısının saytı xəbər verir ki,

Si Cinpin Əliyevi “əziz dost” adlandırıb və onu Tyançində keçirilən “ŞƏT plus” formatında Zirvə görüşündə, eləcə də “Çinin xarici hərbi müdaxilə və faşizm üzərində Qələbəsinin” 80 illiyi münasibətilə keçirilən təntənəli tədbirlərdə və hərbi paradda iştirakına görə təşəkkürünü bildirib.

Çin lideri iki ölkə arasında münasibətlərin “hərtərəfli strateji tərəfdaşlıq səviyyəsində” inkişaf etdiyini vurğulayıb.

O, iki ölkə arasında ticarət dövriyyəsinin artdığını, enerji, o cümlədən bərpa olunan enerji və rəqəmsallaşdırma sahələrində əməkdaşlığın genişləndiyini qeyd edib.

Azərbaycan-Çin əməkdaşlığının “Bir kəmər, bir yol” layihəsi çərçivəsində də gücləndiyini qeyd edən Si Cinpin Çin mallarının Azərbaycan ərazisindən daşınmasının əhəmiyyətini qeyd edərək, bu kontekstdə Transxəzər marşrutunun əhəmiyyətinə toxunub.

ÇXƏ-nin sədri bildirib ki, onun ölkəsi Azərbaycanın Şanxay Əməkdaşlıq Təşkilatı ilə əlaqələrinin genişlənməsini dəstəkləyir.

Si Cinpin Azərbaycan və Ermənistan arasında davamlı sülhün təmin edilməsində birbaşa dialoqun əhəmiyyətini qeyd edib.

ÇXƏ sədri həmçinin bildirib ki, Pekin "Azərbaycanın suveren inkişaf modelini" dəstəkləyir, Pekinin digər ölkələrin daxili işlərinə qarışmamaq prinsipindən irəli gələn öhdəliyini vurğulayıb.

Əliyev isə öz növbəsində ÇXR ilə münasibətlərin inkişaf etdirilməsinin Azərbaycanın xarici siyasətinin prioritet istiqamətlərindən biri olduğunu vurğulayıb.

O, xüsusilə Bakının Tayvan, Honkonq və Sincan-Uyğur Muxtar Bölgəsi ilə bağlı məsələlərdə Çinin mövqeyini dəstəklədiyini qeyd edib.

Azərbaycan Tayvanda keçirilən seçkiləri qınayan ilk ölkələrdən biri olub.

“Bir kəmər, bir yol” layihəsinə toxunan dövlət başçısı Azərbaycan ərazisindən keçən Orta Dəhlizlə daşınan malların, xüsusən də Çin yüklərinin artmasını “bu dəhlizin səmərəliliyinə və cəlbediciliyinə nümunə” kimi qiymətləndirib.

Prezident Əliyev həmçinin vurğulayıb ki, Azərbaycan və Ermənistan arasında münasibətlərin normallaşması və sülh gündəliyi ilə bağlı danışıqlar ikitərəfli əsasda aparılır və iki ölkə arasında artıq sülh bərqərar olub.

Görüşdə Azərbaycan və Çinin beynəlxalq təşkilatlar çərçivəsində daim bir-birini dəstəkləməsi “məmnunluqla” qeyd edilib. Viza rejiminin ləğvi sənədi qüvvəyə mindikdən sonra son vaxtlar turizm sahəsində əlaqələrin inkişaf etdiyi vurğulanıb.

Söhbət zamanı Azərbaycan və Çin arasında əməkdaşlıq perspektivləri barədə geniş fikir mübadiləsi aparılıb.

2025-ci ilin aprelində Əliyev Çinə dövlət səfəri etmişdi. Səfər zamanı “Azərbaycan Respublikası və Çin Xalq Respublikası arasında hərtərəfli strateji tərəfdaşlıq əlaqələrinin qurulmasına dair Birgə Bəyannamə”, iki ölkə arasında viza rejiminin ləğvi haqqında saziş və digər sənədlər imzalanıb.