"Vaşinqton razılaşmalarından imtina Ermənistanın özünə zərər verər – İlham Əliyev"

Ermənistan Azərbaycanla Vaşinqton razılaşmalarından imtina edərsə, ciddi nəticələrlə üzləşəcək. Bu barədə Prezident İlham Əliyev "Əl-Ərəbiyyə" telekanalına müsahibəsində bildirib.

"Əgər Ermənistanda hər hansı daxili siyasi dəyişiklik baş verərsə, bu, sülh prosesinə zərər verə bilərmi?" sualına cavab olaraq Əliyev qeyd edib ki, "yalnız təxmin edə və ümid edə bilər ki, heç nə Azərbaycanla Ermənistan arasında sülh prosesinə mane olmayacaq".

"Biz bilirik ki, gələn yay orada parlament seçkiləri keçiriləcək. Və biz bilirik ki, onlar yeni konstitusiya layihəsi üzərində işləyirlər. Lakin güclü xarici müdaxilə olarsa, bəli, düşünə bilərik ki, bu, əvvəllər razılaşdırılmış məsələləri poza bilər. Lakin bu, Ermənistanın özünə çox zərər verər. Çünki Vaşinqtonda sənədləri kimin imzalamasından asılı olmayaraq, onlar Ermənistan rəhbərinin adından imzalanıb. Əgər orada nə isə baş verərsə, nə isə dəyişərsə və onlar imzalanmış sənədlərdən geri çəkilərsə, bu, Ermənistanla Amerika Birləşmiş Ştatları arasında münasibətləri ciddi şəkildə pisləşdirəcək. Təkcə Amerika Birləşmiş Ştatları deyil, Avropa İttifaqı, Türkiyə, Ərəb ölkələrindəki dostlarımız da daxil olmaqla bütün beynəlxalq ictimaiyyət bu prosesi dəstəkləyib. Bir sözlə, bütün beynəlxalq ictimaiyyət", - Azərbaycan Prezidenti deyib.

Onun sözlərinə görə, "Azərbaycan bu məsələdə müsbət əhval-ruhiyyədədir".

O qeyd edib ki, Azərbaycan və Ermənistan liderləri tərəfindən Vaşinqtonda paraf edilmiş razılaşmanın pozulması "bütün dünyaya qarşı getmək deməkdir". Və onlar bundan nə qazanacaqlar? Vaşinqtonda imzalanan sənəd Ermənistan üçün sülh və sabit inkişafın təminatıdır... Əgər Ermənistanın gələcək hər hansı bir hökuməti, hakimiyyətə nə vaxt gəlməsindən asılı olmayaraq, Vaşinqtonda imzalanan sənədi şübhə altına alarsa, Ermənistan ciddi nəticələrlə üzləşəcək, çünki regionda qüvvələr balansı hər cəhətdən tamamilə bizim xeyrimizədir. Düşünürəm ki, bu, hər kəsə aydındır və əgər Ermənistan yenidən bizim ərazi bütövlüyümüzü şübhə altına alarsa, biz adekvat cavab verəcəyik", - Əliyev sözlərini davam etdirib.

Vaşinqtonda imzalanmış sənədin əhəmiyyətindən danışan Azərbaycan Prezidenti qeyd edib ki, "hər iki tərəf bir-birinin ərazi bütövlüyünü tanıyır və gələcək qarşılıqlı fəaliyyətlərini beynəlxalq hüququn bu fundamental prinsipi əsasında planlaşdıracaq". "Ona görə də əgər Ermənistan bizim ərazi bütövlüyümüzü tanımağı dayandırsa, biz də onların ərazi bütövlüyü ilə bağlı eyni şeyi edəcəyik. Və bu halda kim udacaq, kim uduzacaq? Düşünürəm ki, bu, ritorik sualdır. Hesab edirəm ki, Ermənistanın gələcək hər hansı bir hökuməti Vaşinqtonda əldə etdiyimiz razılaşmalara şübhə etməmək üçün kifayət qədər müdriklik və ağlabatan yanaşma nümayiş etdirəcək. Və bir daha qeyd edirəm: bu, iki dövlət arasında sazişdir. Bu, mənimlə Paşinyan arasında saziş deyil", - Əliyev vurğulayıb.