Azərbaycan və Böyük Britaniya Strateji Tərəfdaşlardır – Douti

Böyük Britaniyanın Avropa üzrə Dövlət Naziri Stiven Douti avqustun 25-də Bakıya səfəri zamanı Böyük Britaniya və Azərbaycan arasında münasibətlərin səviyyəsinin strateji tərəfdaşlığa qaldırıldığını elan edib.

Britaniya səfirliyindən verilən məlumata görə, onun Bakıda apardığı müzakirələr Ermənistan və Azərbaycan arasında sülh prosesinə, Rusiya-Ukrayna münaqişəsinə və regional təhlükəsizliyə həsr olunub.

Səfər Böyük Britaniyanın Azərbaycanda və Cənubi Qafqazda iqtisadi artım, təhlükəsizlik, təhsil və iqlim dəyişikliyi ilə mübarizə sahələrində əməkdaşlığı dərinləşdirmək öhdəliyini vurğulayır.

Douti Böyük Britaniya və Azərbaycan arasında əməkdaşlığın dərinliyini və genişliyini əks etdirən yüksək səviyyəli ikitərəfli danışıqlar aparıb. Prezident İlham Əliyevlə görüşdə dövlət naziri iqtisadi inkişaf və təhlükəsizlik sahələrində əməkdaşlığın genişləndirilməsi imkanlarını müzakirə edərək, Azərbaycanın regional sabitliyin və rifahın təmin edilməsində əsas rolunu qeyd edib.

Nazirin Azərbaycan Prezidentinin köməkçisi Hikmət Hacıyevlə ayrıca söhbəti Böyük Britaniyanın Azərbaycanın regional sülh quruculuğu proseslərində konstruktiv liderliyini yüksək qiymətləndirdiyini təsdiqləyib. Bu danışıqlar Böyük Britaniyanın bütün Cənubi Qafqazda sabitliyə və əməkdaşlığa töhfə verən davamlı diplomatik təşəbbüsləri dəstəkləməyə hazır olduğunu vurğulayıb, press-relizdə əlavə olaraq bildirilib.

Xarici İşlər Nazirliyində nazir Douti nazir Ceyhun Bayramovla “məzmunlu ikitərəfli danışıqlarda” iştirak edib və Böyük Britaniya ilə Azərbaycan arasında Altıncı Strateji Dialoqa həmsədrlik edib. “Bu müzakirələr hər iki ölkənin davam edən Rusiya-Ukrayna münaqişəsi və daha geniş regional təhlükəsizlik problemləri daxil olmaqla, müasir çağırışların həllinə sadiqliyini vurğuladı. Görüşlər Böyük Britaniyanın mürəkkəb geosiyasi vəziyyətdən çıxmaq və regional sabitliyi qorumaq üçün Azərbaycanı əvəzolunmaz tərəfdaş kimi tanıdığını nümayiş etdirdi. Böyük Britaniya və Azərbaycan münasibətləri strateji tərəfdaşlıq səviyyəsinə qaldırmağa razılaşıblar ki, bu da hər iki ölkəyə əsas strateji prioritetlər üzrə daha sıx əməkdaşlıq etməyə imkan verəcək”, - Britaniya səfirliyinin press-relizində qeyd olunub.

Səfər çərçivəsində Azərbaycanda fəaliyyət göstərən Britaniya şirkətlərinin nümayəndələri ilə işgüzar nahar təşkil edilib ki, burada iştirakçılar investisiya və strateji tərəfdaşlıq üçün geniş imkanları müzakirə ediblər. “Azərbaycanın regional enerji lideri mövqeyi və “Orta Dəhliz” ticarət marşrutunun inkişafında müstəsna potensialı bu müzakirələrin əsas mövzusu olub. Bu əməkdaşlıq Azərbaycanın iqtisadi şaxələndirmə və inkişaf məqsədlərinə töhfə verməklə yanaşı, Böyük Britaniyanın təmiz enerji supergücünə çevrilmək missiyasını birbaşa dəstəkləyir”, - Britaniya tərəfi qeyd edib.

Səfər nazir Doutinin Cənubi Qafqaza geniş səfərinin bir hissəsi olub və Böyük Britaniyanın Azərbaycanla Ermənistan arasında sülh danışıqlarında son irəliləyişdən sonra regional sabitliyin qorunmasına sarsılmaz sadiqliyini nümayiş etdirib. Bu səfərin uğurla başa çatması qarşılıqlı hörmətə, ortaq maraqlara və hər iki ölkənin regional rifah və təhlükəsizliyə verdiyi töhfələrin tanınmasına əsaslanan Böyük Britaniya və Azərbaycan arasında münasibətlərdə yeni fəsil açır.

Məlumatlı mənbələrdən verilən xəbərə görə, Douti həmçinin vətəndaş cəmiyyəti, vəkillər və LGBT icmalarının nümayəndələrinin iştirak etdiyi ayrıca görüş keçirib.

Lakin bu barədə rəsmi press-relizdə məlumat öz əksini tapmayıb.