Bəhruz Səmədov Aclıq Aksiyasını Dayandırıb

Bəhruz Səmədov

Azərbaycanda dövlətə xəyanətdə ittiham olunaraq 15 il azadlıqdan məhrum edilən gənc tədqiqatçı və müharibə əleyhinə fəal Bəhruz Səmədov nənəsinin israrlı xahişlərindən sonra aclıq aksiyasına son verib.

İctimai fəal Əmrah Təhməzovun verdiyi məlumata görə, sentyabrın 11-də Səmədovun nənəsi Zibeydə Osmanova ilə telefon danışığı olub.

"Nənəsi Bəhruzdan aclıq aksiyasını dayandırmağı israrla xahiş etdi, yalvardı, çünki bu yaşda nəvəsinin əzabına dözə bilməzdi. Bundan sonra Bəhruz aclıq aksiyasını dayandırmağa razı oldu. Bəhruzu azad edin!" Təhməzov Facebookda yazıb.

Səmədov sentyabrın 6-da Bakı Apellyasiya Məhkəməsinin hökmündən verdiyi şikayəti təmin etməməsindən sonra aclıq aksiyası elan edib.

Bəhruz Səmədov 2024-cü il avqustun 21-də Azərbaycanda saxlanılıb və dövlətə xəyanət ittihamı ilə həbs edilib. İstintaqın versiyasına görə, o, Ermənistan nümayəndələrinin sifarişi ilə məqalələr yazıb və tərcümə edib. İttiham Bəhruz Səmədovun Ermənistandan olan üç qadınla yazışmasına əsaslanır. Səmədov özü dövlətə xəyanət ittihamını qəti şəkildə rədd edib. Səmədov xarici nəşrlərdə səsləndirdiyi Azərbaycan hakimiyyətinə qarşı tənqidləri ilə tanınır. Müdafiə tərəfi hesab edir ki, onun həbsinin səbəbi "müharibə əleyhinə baxışları" olub.

İyunun 23-də Bakı Ağır Cinayətlər Məhkəməsi onu 15 il müddətinə azadlıqdan məhrum edib.