Azərbaycan və Aİ Naxçıvanın nəqliyyat infrastrukturunun yenilənməsi sahəsində əməkdaşlıq edə bilər.

Azərbaycan Respublikasının Prezidenti İlham Əliyev avqustun 28-də Avropa İttifaqının Cənubi Qafqaz üzrə xüsusi nümayəndəsi Maqdalena Qrononu qəbul edib.

Azərbaycan dövlət başçısının saytının məlumatına görə, Qrono İlham Əliyevə “Aİ rəhbərliyinin salamlarını çatdırıb, həmçinin Avropa İttifaqının rəhbərliyi və öz adından Prezidenti Ermənistanla münasibətlərin normallaşdırılması və sülh gündəliyi ilə bağlı Vaşinqtonda əldə olunan mühüm nəticələr münasibətilə təbrik edib”. O, bu prosesin regionda davamlı sülhün təmin edilməsinə böyük töhfə verdiyini vurğulayıb.

Qonaq Avropa İttifaqı ölkələrinin Azərbaycanla Ermənistan arasında sülhün əldə olunmasını dəstəklədiyini qeyd edib. Bundan əlavə, Qrono Aİ-nin iki ölkə arasında razılaşdırılmış məsələlərin, o cümlədən nəqliyyat dəhlizinin yaradılması məsələsinin reallaşmasına dəstək verməyə hazır olduğunu bildirib.

Əliyev Vaşinqtonda əldə olunan nəticələrin “tarixi əhəmiyyətini qeyd edərək, bu prosesdə Amerika Birləşmiş Ştatlarının rolunu xüsusi vurğulayıb”. Prezident ABŞ-ın vasitəçiliyi ilə imzalanan Vaşinqton Bəyannaməsini, sülh sazişinin paraf edilməsini, həmçinin Azərbaycan və Ermənistanın Minsk qrupunun buraxılması ilə bağlı birgə müraciətini “sülhə doğru mühüm addımlar” adlandırıb.

Görüşdə Azərbaycanın Ermənistanla ikitərəfli əsasda etimadın gücləndirilməsi tədbirlərini dəstəklədiyi qeyd edilib. Azərbaycanın əsas hissəsi ilə Naxçıvan MR arasında maneəsiz nəqliyyat və tranzit əlaqəsinin yaradılmasının vacibliyi xüsusi vurğulanıb, Naxçıvanın nəqliyyat infrastrukturunun yenilənməsi sahəsində Aİ ilə geniş əməkdaşlıq imkanlarının olduğu bildirilib.

Söhbət zamanı Azərbaycanla Avropa İttifaqı arasında əlaqələrin inkişaf perspektivləri barədə də fikir mübadiləsi aparılıb.