ABŞ-ın Ticarət Missiyası Bakıya Gəlib

Azərbaycanın xarici işlər naziri Ceyhun Bayramov sentyabrın 8-də Bakıda səfərdə olan ABŞ-ın Orta Dəhliz üzrə ticarət missiyasının nümayəndələrini qəbul edib.

Azərbaycan XİN-dən verilən məlumata görə, görüşdə avqustun 8-də Vaşinqtonda Azərbaycan, Ermənistan və ABŞ liderlərinin iştirakı ilə imzalanan sənədlərin və aparılan danışıqların tarixi əhəmiyyəti qeyd olunub.

Əldə edilən razılıqlar təkcə regional sülh və tərəqqiyə töhfə vermir, eyni zamanda Azərbaycan-ABŞ münasibətləri üçün böyük perspektivlər açır.

"Bu kontekstdə Azərbaycanın qərb rayonları ilə Naxçıvan Muxtar Respublikası arasında maneəsiz əlaqə layihəsinin əhəmiyyəti vurğulanıb", - deyə Azərbaycan XİN-dən bildirilib.

Xarici siyasət idarəsindən qeyd olunub ki, Azərbaycan son illərdə Orta Dəhlizin canlandırılması və işlək vəziyyətə gətirilməsi üçün böyük səylər göstərib, Bakı-Tbilisi-Qars dəmir yolu, Bakı Beynəlxalq Dəniz Ticarət Limanı və Ələt Azad İqtisadi Zonası kimi bu istiqamətdə konkret layihələr həyata keçirib.

Bundan başqa, Azərbaycanın "Orta Dəhliz üzrə şərq tərəfdaşları, həmçinin Mərkəzi Asiyanın dost və qardaş ölkələri ilə strateji əlaqələrə" malik olduğu qeyd olunub.

Tərəflər Azərbaycanın uzun illər Avropanın enerji təhlükəsizliyinin təmin edilməsində mühüm rol oynadığını və Azərbaycandan təbii qaz alan ölkələrin sayının 14-ə çatdığını vurğulayıblar. Hazırda Azərbaycan Avropaya bərpa olunan enerjinin inkişafı və tədarükü üzrə irimiqyaslı layihələr həyata keçirir. Bu kontekstdə Qara dənizdən keçən sualtı enerji kabelinin tikintisinin əhəmiyyəti qeyd olunub, - deyə Azərbaycan XİN-in məlumatında bildirilir.