Tofiq Yaqublunun vəkili onun «qanunsuz axtarışı» cəhdinə etiraz edib

Tofiq Yaqublu

Vəkil Nemət Kərimli müdafiə etdiyi həbsdə olan siyasətçi Tofiq Yaqublu ilə görüşdən imtina edib.

O, bu qərarını Facebook səhifəsində Penitensiar Xidmətin əməkdaşlarının onu qanunsuz axtarışa məruz qoymağa cəhd etmələri ilə izah edib.

Kərimli bildirib ki, avqustun 15-də Penitensiar Xidmətin müalicə müəssisəsinə Yaqublu ilə görüşə gələndə, girişdəki əməkdaşlar onu axtarmaq və bəzi sənədlərini götürmək istəyiblər. Lakin o, axtarışa razılaşmayıb və nəticədə görüşdən imtina edib.

Vəkil qeyd edib ki, «Tofiq Yaqublunun aclıqdan sonra bərpa dövründə onunla görüşmək xatirinə bu qanunsuzluqla barışmaq hələ də mümkün idi. Ancaq sonuncu dəfə, avqustun 8-də açıq axtarış aparılıb. Mən, təbii ki, etiraz etdim, bundan sonra rəis mənə telefonla bunun xüsusi yer olduğunu, axtarış aparılması, sənədlərin yoxlanılması və istənilən qərarın qəbul edilməsinin lazım olduğunu söylədi».

Nazirlər Kabinetinin «Həbs yerlərinin Daxili İntizam Qaydalarının təsdiqi haqqında» qərarına istinad edən Kərimli xatırladıb ki, «senzura həbs edilənlərin müdafiəçilərinin yazışmalarına şamil edilmir».

Vəkil bildirib ki, Yaqublunun mühakimə olunduğu «İsmayıllı hadisələri ilə bağlı iş» hazırda İnsan Hüquqları üzrə Avropa Məhkəməsində kommunikasiya mərhələsindədir, buna görə də o, müvəkkili ilə görüşməli idi.

Martın 10-da Bakı Ağır Cinayətlər Məhkəməsi T.Yaqublunu 9 il azadlıqdan məhrum edib.

O, xüsusilə külli miqdarda ziyan vuran dələduzluqda və saxta sənədlərin hazırlanması və istifadəsində təqsirli bilinib.

O, özü bu ittihamları saxta hesab edir.

2013-cü ildə Yaqublu İsmayıllı şəhərindəki etiraz aksiyalarını işıqlandırdığı üçün Cinayət Məcəlləsinin 233-cü (ictimai qaydanı pozan hərəkətlərin təşkili və ya belə hərəkətlərdə fəal iştirak etmə) və 315-ci (hakimiyyət nümayəndəsinə müqavimət göstərmə və ya ona qarşı güc tətbiq etmə) maddələri ilə həbs olunub. Şəki Ağır Cinayətlər Məhkəməsinin qərarı ilə 5 il azadlıqdan məhrum edilib.

Onun həbsi beynəlxalq ictimaiyyət, o cümlədən ABŞ və Avropa İttifaqı tərəfindən pislənilib. 2016-cı ilin mart ayında Yaqublu əfv sərəncamı ilə azadlığa buraxılıb.