Həbsdə olan Abzas Media-nın aclıq edən direktoru tibbi yardımın olmamasından şikayətləndi

Abzas Media-nın direktoru Ülvi Həsənli

5 avqust 2025-ci il

Həbsdə aclıq aksiyası keçirən Abzas Media-nın direktoru Ülvi Həsənlinin səhhəti pisləşib, lakin ona tibbi yardım göstərilmir. Bu barədə jurnalistin yaxınları məlumat verib.

Həyat yoldaşı Rubabə Quliyeva bildirib ki, aclıq aksiyası fonunda Ülvi Həsənlinin vəziyyəti pisləşməkdə davam edir və 16 gün ərzində o, 15 kq çəki itirərək hazırda 63 kq-dır.

«Şüşə arakəsmə arxasından görüşümüzdə Ülvi güclə ayaq üstə dururdu. Ülvi ilə qeyri-insani rəftar olunur. 40 dərəcə istidə aclıq edən şəxsi pəncərəsi və ya havalandırma sistemi olmayan karserdə saxlayırlar», - Quliyeva facebook-da yazıb.

O, bunun nəticəsində Həsənlinin nəfəs darlığından və ürək döyüntülərinin artmasından əziyyət çəkdiyini qeyd edib.

«Ürəyi o qədər sürətlə döyünür ki, sanki yerindən çıxacaq. Nəticədə orqanizmində qan dövranı zəifləyib, ürəyinə az qan getdiyinə görə ayaqları keyləşir. Bədəni soyuq tərlə örtülüb, böyrəklərində ağrılar yaranıb, qan təzyiqi düşüb», - Quliyeva davam edib.

Həyat yoldaşının sözlərinə görə, Həsənli üzərində heç bir tibbi nəzarət yoxdur.

«Nəzarətçiyə validol veriblər ki, Ülvinin vəziyyəti pisləşsə, ona 2 həb versin. Əslində, Ülvini yavaş-yavaş ölümə məhkum edirlər», - Quliyeva bildirib.

Onun sözlərinə görə, yaxınlarının Həsənlinin həbsxana xəstəxanasına köçürülməsi ilə bağlı müraciətləri cavabsız qalır.

Abzas Media-nın direktoru Ülvi Həsənli iyulun 20-də Bakı 1 saylı İstintaq Təcridxanasından Umbakıdakı penitensiar kompleksə köçürülməsinə etiraz olaraq aclıq aksiyası elan edib. Həsənli Umbakı həbsxana kompleksindəki saxlanma şəraitindən narazıdır, çünki orada üç yaşlı uşağı da daxil olmaqla ailə üzvləri ilə canlı görüşlərdən məhrum edilib.

Abzas Media-nın beş əməkdaşı - direktor Ülvi Həsənli, baş redaktor Sevinc Vaqifqızı, tərcüməçi Məhəmməd Kekalov, müxbirlər Nərgiz Absalamova və Elnarə Qasımova, eləcə də Turan İnformasiya Agentliyinin iqtisadi şöbəsinin rəhbəri, araşdırmaçı jurnalist Hafiz Babalı 2023-cü ilin noyabr-2024-cü ilin yanvar aylarında xarici valyuta qaçaqmalçılığı ittihamı ilə həbs ediliblər. 2024-cü ilin iyununda Azərbaycan «Azadlıq Radiosu» xidmətinin iqtisadi icmalçısı Fərid Mehralızadə də bu işlə bağlı həbs edilib.

2024-cü ilin avqustunda aparılan ilkin istintaqın nəticələrinə əsasən, iş üzrə fiqurantlara Azərbaycan Cinayət Məcəlləsinin daha altı maddəsi ilə ittiham irəli sürülüb. Onlar ittihamları rədd edərək, jurnalist araşdırmalarına görə təqib olunduqlarını bildiriblər.

20 iyun 2025-ci ildə məhkəmə Abzas Media-nın jurnalistlərini və əməkdaşlarını uzunmüddətli həbs cəzasına məhkum edib. Nəşrin direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı, iqtisadçı Fərid Mehralızadə hər biri 9 il, Nərgiz Absalamova və Elnarə Qasımova 8 il, Məhəmməd Kekalov isə 6,5 il azadlıqdan məhrum edilib.

Abzas Media işi 2023-cü ilin noyabrından etibarən Azərbaycanda müstəqil medianın jurnalistlərinin həbslər silsiləsinin başlanğıcı olub. Oxşar ssenari ilə bir neçə cinayət işi, o cümlədən müstəqil onlayn resursların - Toplum TV və Meydan TV-nin əməkdaşlarının kollektiv həbsləri ilə bağlı işlər açılıb.