AŞPA-dan fərqli olaraq, Berset Azərbaycanla əməkdaşlıqdan məmnundur

BMT Baş Assambleyasının sessiyasında iştirakı çərçivəsində Azərbaycan Prezidenti İlham Əliyev sentyabrın 23-də Nyu-Yorkda Birləşmiş Millətlər Təşkilatının qərargahında Avropa Şurasının Baş katibi Alen Berset ilə görüşüb.

Azərbaycan dövlət başçısının saytının məlumatına görə, söhbət zamanı ATƏT-in Minsk qrupunun fəaliyyətinin dayandırılması, avqustun 8-də Vaşinqtonda Azərbaycan və Ermənistan arasında münasibətlərin normallaşması haqqında sazişin paraflanması məsələlərinə toxunulub və ABŞ Prezidenti Donald Trampın şahidliyi ilə imzalanan “Vaşinqton Bəyannaməsinin əhəmiyyəti” qeyd edilib.

Berset Avropa Şurasının regional sülh gündəliyini dəstəklədiyini vurğulayıb.

Avropa Şurasının Baş katibi COP29 zamanı Azərbaycana səfərini, eləcə də o zaman və digər beynəlxalq tədbirlər çərçivəsində Əliyevlə keçirilən görüşlərini “məmnunluqla” xatırlayıb.

Görüşdə Azərbaycan və Avropa Şurası arasında əməkdaşlıq məsələləri ətrafında fikir mübadiləsi aparılıb.

Azərbaycan rəhbərliyi ilə Avropa Şurasının Baş katibi arasında fəal dialoq Bakının təşkilatın parlament assambleyası və bir sıra monitorinq strukturları ilə əməkdaşlıqdan imtina etməsi fonunda aparılır.

Buna səbəb 2024-cü ilin yanvarında Azərbaycan nümayəndə heyətinin AŞPA-dakı səlahiyyətlərinin dayandırılması, ölkənin təşkilat qarşısında əsas öhdəliklərini yerinə yetirməməsi və seçkilərin monitorinqi üçün assambleya nümayəndələrini dəvət etməməsidir.