Azərbaycan və Ermənistan “blits-səfərlər” mübadiləsi aparıblar

Azərbaycanın dövlət informasiya agentliyi xəbər verir ki, sentyabrın 5-də Azərbaycan Respublikası baş nazirinin müavini Şahin Mustafayev və Ermənistan Respublikası baş nazirinin müavini Mher Qriqoryanın rəhbərliyi ilə iki ölkənin nümayəndə heyətlərinin Azərbaycan Respublikası və Ermənistan Respublikasının ərazilərində qarşılıqlı səfərləri baş tutub. “Bu il avqustun 8-də Vaşinqtonda əldə olunan razılaşmalara uyğun olaraq, tərəflər sərhəd xəttinin müvafiq sahələrinin/hissələrinin delimitasiyası və minalardan təmizlənməsi, həmçinin zəruri infrastrukturun bərpası və tikintisi, eləcə də kommunikasiyaların yaradılması sahəsində fəaliyyətlərin sinxronlaşdırılması məqsədilə onların həyata keçirilməsi müddətləri ilə bağlı məsələləri müzakirə ediblər”, — məlumatda daha sonra qeyd olunub.

Nümayəndə heyətlərinin rəhbərləri iki ölkənin sərhədlərin delimitasiyası üzrə dövlət komissiyalarının növbəti görüşünün təşkili barədə fikir mübadiləsi aparıblar.

Məlumatda iki ölkənin nümayəndə heyətlərinin görüşlərinin konkret olaraq harada baş tutduğu göstərilmir. Lakin görüşlərin mövzusunu və eyni gündə keçirilməsini nəzərə alsaq, nümayəndə heyətləri sərhədyanı ərazilərdə bir-birilərinə “qonaq olublar”.