Türkiyə Silahlı Qüvvələrinin yeni Baş Qərargah rəisi Azərbaycanın hərbi rəhbərliyi ilə görüşüb

Türkiyə Respublikası Silahlı Qüvvələri Baş Qərargahının rəisi, ordu generalı Səlcuk Bayraktaroğlu sentyabrın 15-də Bakıya işgüzar səfəri çərçivəsində Azərbaycanın hərbi rəhbərliyi ilə görüşüb.

Müdafiə Nazirliyində keçirilən görüşdə Azərbaycanın naziri Zakir Həsənov Türkiyənin Azərbaycana davamlı dəstəyini yüksək qiymətləndirib və sentyabrın 15-nin – “Bakının daşnak-bolşevik işğalından azad edilməsi gününün” Azərbaycan xalqı üçün tarixi əhəmiyyətini vurğulayıb.

Azərbaycan Müdafiə Nazirliyinin mətbuat xidmətindən verilən məlumata görə, o, Bayraktaroğlunu Türkiyə Respublikası Silahlı Qüvvələri Baş Qərargah rəisi vəzifəsinə təyin olunması münasibətilə təbrik edib.

Öz növbəsində, general Bayraktaroğlu “bu cür səfərlərin və görüşlərin qarşılıqlı etimad və dostluğa əsaslanan münasibətlərin inkişafına müsbət töhfə verdiyini” qeyd edib.

Bayraktaroğlu Azərbaycan Silahlı Qüvvələrinin Baş Qərargah rəisi Kərim Vəliyevlə də görüşüb.

Görüş zamanı Vəliyev Azərbaycan Ordusundakı yeniliklərdən danışıb və “iki ölkə arasında hərbi əməkdaşlığın daha da inkişaf etdirilməsi üçün bütün imkanların mövcudluğunu” vurğulayıb.

Tərəflər hərbi, hərbi-texniki, hərbi-təhsil və digər sahələrdə əməkdaşlığın mövcud vəziyyəti və gələcəkdə genişləndirilməsi barədə ətraflı fikir mübadiləsi aparıb, həmçinin qarşılıqlı maraq doğuran digər məsələləri müzakirə ediblər.

Görüşlər zamanı hərbi əməkdaşlığın yeni perspektivləri, regional təhlükəsizlik və tərəfləri maraqlandıran digər məsələlər müzakirə olunub.

15 sentyabr 1918-ci ildə Qafqaz İslam (türk) Ordusunun dəstəyi ilə Bakı işğalçı qoşunlardan azad edilib, bundan sonra həmin il mayın 28-də elan edilmiş Azərbaycan Xalq Cümhuriyyəti hökumətinin Gəncədən paytaxta köçməsi mümkün olub.