Rusiya miqrantlar üçün patent sistemini növbəli iş modeli ilə əvəz edəcək

Rusiya miqrant əməyi ilə bağlı qanunvericiliyinə yenidən baxmağa hazırlaşır, mövcud patent sistemini ləğv edərək yeni növbəli iş modelini tətbiq edəcək. Dövlət Dumasının fraksiya rəhbəri Sergey Mironovun sözlərinə görə, bununla bağlı qanunun payızda qəbul ediləcəyi gözlənilir. Yeni sistem "gəldi – işlədi – getdi" prinsipi ilə fəaliyyət göstərəcək və ölkədəki xarici işçilərin şərtlərini əhəmiyyətli dərəcədə dəyişdirəcək.

Bu təşəbbüs sentyabrın 18-də Prezident Vladimir Putinlə Dövlət Duması fraksiya liderlərinin görüşündən sonra güclənib. "Ədalətli Rusiya – Ədalət Uğrunda" partiyasının sədri olan Mironov görüşdən sonra bildirib ki, Rusiyada patent sistemi yaxın zamanda ləğv olunacaq və növbəli iş sistemi tətbiq ediləcək. Prezident Putin də miqrantlar üçün patent sisteminin ləğvinin nəzərdən keçirilə biləcəyini deyib ki, bu da Mironov tərəfindən qanun layihəsinə "yaşıl işıq" yandırılması kimi şərh edilib. Mironov jurnalistlərə bildirib ki, Dövlət Duması bu qanunu payız sessiyasında qəbul edə bilər.

Rusiyanın iqtisadi inkişaf naziri Maksim Reşetnikov miqrantlar üçün "növbəli iş" üsulu barədə daha ətraflı danışaraq bildirib ki, xarici işçi qüvvəsinin cəlbi mexanizmi ciddi tənzimlənməlidir. O, prinsipi "gəldi – işlədi – getdi" kimi təsvir edib. Bu yeni sistemə əsasən, miqrantlara ailələrini Rusiyaya gətirməyə icazə verilməyəcək və övladlarını burada oxutmağa icazə verilməyəcək. "İnsanlar başqa ölkələrdən gəlirlər, pul qazanırlar və gedirlər. Bizə burada obyektiv olaraq ailələr lazım deyil, öz vətəndaşımız olmayan şəxsləri oxutmağa borclu deyilik", – deyə Reşetnikov əlavə edib.

Rusiyada işləyən miqrantlar üçün patent sistemi 2010-cu ildən tətbiq olunurdu. Bu sistem miqrantlara ödəniş etməklə müəyyən regionlarda yaşamağa, işləməyə və bir şirkətə bağlanmadan sərbəst iş axtarmağa imkan verirdi. Patentlərin ləğvi bir çox miqrantın Rusiyada tez bir zamanda iş tapmasını çətinləşdirə və kütləvi deportasiyalarla nəticələnə bilər.