Əliyev və Zelenski Rusiyanın SOCAR-ın Ukraynadakı obyektlərinə zərbələrini pisləyib

10 avqust 2025-ci il.

Əliyev və Zelenski Rusiyanın Azərbaycanın dövlət neft şirkəti SOCAR-ın Ukraynadakı obyektlərinə endirdiyi zərbələri pisləyib. Əgər Moskva Azərbaycanın maraqlarına qarşı təcavüzkar siyasətini davam etdirsə, Bakı Ukraynaya silah tədarükünə qoyulan embarqonu ləğv edə bilər.

Ukrayna Prezidenti Volodimir Zelenski avqustun 10-da Azərbaycan Respublikasının Prezidenti İlham Əliyevə zəng edib.

Azərbaycan dövlət başçısının saytının məlumatına görə, "telefon danışığı zamanı Ukrayna Prezidenti Amerika Birləşmiş Ştatlarının Prezidenti Donald Trampın dəstəyi ilə Ermənistan və Azərbaycan arasında sülh gündəliyi ilə bağlı əldə edilmiş uğurlara görə dövlət başçımızı təbrik edib".

Təbriklərə görə təşəkkür edən Əliyev qeyd edib ki, "Ermənistan və Azərbaycan arasında əldə olunmuş razılaşmalar, xüsusilə də ABŞ Prezidentinin şahidliyi ilə iki ölkə arasında imzalanan bəyannamə və digər sənədlər regionda davamlı sülhün, sabitliyin və rifahın təmin edilməsinə xidmət edəcək".

Telefon danışığı zamanı tərəflər "Rusiyanın Azərbaycanın SOCAR şirkətinin Ukrayna ərazisindəki neft bazasına və ölkəmizin digər obyektlərinə, habelə Azərbaycan qazını Ukraynaya nəql edən qaz-kompressor stansiyasına məqsədyönlü aviazərbələrini" pisləyib. Onlar "bunun heç bir halda Azərbaycanla Ukrayna arasında enerji sahəsində əməkdaşlığın dayandırılmasına gətirib çıxarmayacağına" əminliklərini ifadə ediblər.

Azərbaycan Prezidenti Administrasiyasına yaxın olan Caliber.az informasiya agentliyinin "etibarlı mənbələrə" istinadən verdiyi məlumata görə, "əgər Rusiya Azərbaycanın maraqlarına qarşı öz təcavüzkar siyasətini davam etdirsə, rəsmi Bakı öz arsenalında olan Ukraynaya silah tədarükünə qoyulan embarqonun ləğvi məsələsinə baxmağa başlayacaq".

2025-ci il avqustun 7-dən 8-nə keçən gecə Rusiya qoşunları Azərbaycanın SOCAR şirkətinin Ukraynanın Odessa vilayətindəki neft bazasına hücum edib. Rusiya SOCAR neft bazasına beş "Şahid" kamikadze pilotsuz təyyarəsi göndərərək yanğına səbəb olub və dizel boru kəmərini zədələyib. Şirkətin dörd əməkdaşı ağır yaralar alıb. Bu, son həftələr ərzində Ukraynada Azərbaycanla bağlı obyektlərə ikinci hücumdur. Bundan əvvəl Orlovka yaxınlığında yerləşən, iyunun 28-də Ukraynaya Azərbaycan qazının verilməsinə başlanan Transbalkan qaz kəmərinin əsas elementi olan qazpaylayıcı stansiyaya hücum edilib.