Rusiyanın ən azı 21 regionu 9 May ərəfəsində genişmiqyaslı internet kəsintilərinə hazırlaşır

9 May paradları və yürüşləri ərəfəsində Rusiyanın ən azı 21 regionunda mobil internetə genişmiqyaslı məhdudiyyətlərin tətbiqi gözlənilir. Bu barədə telekommunikasiya operatorlarının, bank xidmətlərinin və regional medianın xəbərdarlıqlarını təhlil edən "Novaya Qazeta Avropa" məlumat yayıb.

Qəzetin yazdığına görə, operatorlar və xidmətlər bayram tədbirlərinin, paradların və "Ölməz Alay" yürüşlərinin keçirildiyi regionlarda istifadəçilərə mümkün internet kəsintiləri barədə bildirişlər göndərməyə başlayıblar. Əksər hallarda mesajlarda məhdudiyyətlərin 5 maydan 9 mayadək qüvvədə ola biləcəyi qeyd edilir.

MTS, Yota, MegaFon, T2 və Beeline mobil operatorları mümkün kəsintilər barədə xəbərdarlıq edirlər. Analoji bildirişlər "Sberbank" və "Yandex Go" tətbiqlərində də peyda olub.

Daha əvvəl "BBC Rus Xidməti" öz mənbələrinə istinadən xəbər vermişdi ki, bu il Moskvada mobil xidmətlərə "daha ciddi" məhdudiyyətlər gözlənilir. Bu məlumatlara görə, 5, 7 və 9 may tarixlərində Moskvada təkcə mobil internet deyil, həm də mobil rabitə, SMS ismarıcları və "ağ siyahılar" adlanan sistemin işi məhdudlaşdırıla bilər.

Mayın 4-ü axşam saatlarında Sankt-Peterburq, Kazan və Moskva vilayətində də mümkün məhdudiyyətlər barədə xəbərlər yayılıb. Bundan sonra regional media qurumları digər şəhərlərdə də internetin söndürülməsinə hazırlıq barədə kütləvi şəkildə məlumat verməyə başlayıblar.

"Novaya Qazeta Avropa" Həştərxan, Volqoqrad, Voronej, Ekaterinburq, Kalininqrad, Krasnodar, Nijni Novqorod, Omsk, Petropavlovsk-Kamçatski, Samara, Saratov, Tula, Ufa, Çelyabinsk və Yujno-Saxalinskdə bu cür məlumatlar aşkar edib.

Krasnoyarsk və Smolensk regional mediasında da oxşar xəbərlər çıxsa da, yerli hakimiyyət orqanları internetin söndürülməsi planlarını təkzib edirlər.

Monitorinq layihələrinin məlumatına görə, artıq Moskva və Sankt-Peterburqda məhdudiyyətlər qeydə alınıb. Mayın 5-i Moskva vaxtı ilə saat 12:30 radələrində Rəqəmsal İnkişaf, Rabitə və Kütləvi Kommunikasiyalar Nazirliyi Moskvada mobil internetin söndürülməsinin başa çatdığını elan edib. Lakin "Amnezia Pulse" layihəsinin məlumatına görə, məhdudiyyətlər 15 dəqiqə sonra hələ də qüvvədə idi.

Samara, Nijni Novqorod, Moskva vilayətləri və Perm diyarı sakinləri də mobil internet kəsintiləri barədə məlumat veriblər.

Hazırkı məhdudiyyətlər Qələbə Günü qeyd etmələri ilə bağlı təhlükəsizlik tədbirlərindən irəli gəlir. Keçən il Qələbə Gününün 80-ci ildönümü ərəfəsində Rusiya hakimiyyəti ilk dəfə Moskvada kütləvi internet kəsintilərini sınaqdan keçirmişdi. Həmin vaxt, 7 may səhəri paytaxt sakinləri mobil rabitə və internetdə fasilələr barədə məlumat verməyə başlamışdılar.